ಯಶ್ ಹೇಳಿದ್ರು – ರಾಮಾಯಣ ಸಿನಿಮಾ ಅಲ್ಲ, ಅದು ಆಶೀರ್ವಾದ!
ಬೆಂಗಳೂರು: ಕೆಜಿಎಫ್ ಸ್ಟಾರ್ ಯಶ್ ಅವರು ನಿನ್ನೆ (ಅಕ್ಟೋಬರ್ 15) ಬೆಂಗಳೂರಿನಲ್ಲಿ ನಡೆದ ರಾಮಾಯಣ ಸಿನಿಮಾದ ಟ್ರೈಲರ್ ಬಿಡುಗಡೆ ಕಾರ್ಯಕ್ರಮದಲ್ಲಿ ಮಾತನಾಡಿದ್ದು, ಈಗ ಎಲ್ಲೆಡೆ ವೈರಲ್ ಆಗಿದೆ.
“ಇದು ಸಿನಿಮಾ ಅಂತ ಅಂದುಕೊಂಡಿಲ್ಲ”
ವೇದಿಕೆ ಮೇಲೆ ಮಾತನಾಡಿದ ಯಶ್, “ರಾಮಾಯಣ ಸಿನಿಮಾವನ್ನು ನಾವು ಕಲಾವಿದರು, ತಂತ್ರಜ್ಞರು ಸಿನಿಮಾ ಎಂದು ಅಂದುಕೊಂಡೇ ಇಲ್ಲ. ಇದು ನಮಗೆ ಸಿಕ್ಕಿರುವ ಆಶೀರ್ವಾದ ಎಂದು ಭಾವಿಸಿ ಕೆಲಸ ಮಾಡಿದ್ದೇವೆ. ನಮ್ಮ ದೇಶದ ಸಂಸ್ಕೃತಿ, ಪುರಾಣವನ್ನು ವಿದೇಶಿಗರಿಗೆ ತಲುಪಿಸುವ ಕೆಲಸ ಮಾಡುತ್ತಿದ್ದೇವೆ. ಇದೇ ಮೊದಲ ಬಾರಿಗೆ ಭಾರತದ ಸಿನಿಮಾವೊಂದನ್ನು ವಿದೇಶಿ ಸಂಸ್ಥೆ ಹಾಲಿವುಡ್ ಸಿನಿಮಾ ರೀತಿ ವಿತರಣೆ ಮಾಡುತ್ತಿದೆ” ಎಂದರು.
VFX ಬಗ್ಗೆ ಟ್ರೋಲ್ ಮಾಡುವವರಿಗೆ ಖಡಕ್ ಉತ್ತರ!
ಸೋಷಿಯಲ್ ಮೀಡಿಯಾದಲ್ಲಿ VFX ಚೆನ್ನಾಗಿಲ್ಲ, ಆ ನಟ ಬೇಡ, ಈ ನಟಿ ಬೇಕಿತ್ತು ಎಂದು ಹೇಳುವವರಿಗೆ ಯಶ್ ತಿರುಗೇಟು ನೀಡಿದರು.
“ಕೆಲವೊಮ್ಮೆ ಈ ರೀತಿಯ ಪ್ರಯೋಗಗಳನ್ನು, ಹುಂಬತನಗಳನ್ನು ತೋರಿಸಬೇಕಾಗುತ್ತದೆ. ಗಡಿ ದಾಟಿ, ಸರ್ವಸ್ವವನ್ನೂ ಪಣಕ್ಕಿಟ್ಟು ಪ್ರಯತ್ನ ಮಾಡಬೇಕು. ಆಗ ಮಾತ್ರ ಮೈಲಿಗಲ್ಲಾಗುತ್ತೆ.
ನಾನು ಸೋಷಿಯಲ್ ಮೀಡಿಯಾದಲ್ಲಿ ನೋಡಿದ್ದೇನೆ. VFX ಹಾಗಿರಬೇಕಿತ್ತು, ಹೀಗಿರಬೇಕಿತ್ತು ಅಂತಾರೆ. ಅದು ಬೇಡ. ಆ ಬ್ರಿಟಿಷರು ಮಾಡಿದ್ದು ಸಹ ಇದನ್ನೇ, ಡಿವೈಡ್ ಅಂಡ್ ರೂಲ್ (ಒಡೆದು ಆಳುವ ನೀತಿ). ಉದ್ದೇಶ ಒಳ್ಳೆಯದಿದ್ದಾಗ, ಶ್ರಮದಲ್ಲಿ ಪ್ರಾಮಾಣಿಕತೆ ಇದ್ದಾಗ ಎಲ್ಲರೂ ಒಟ್ಟಿಗೆ ನಿಲ್ಲಬೇಕು” ಎಂದು ಮನವಿ ಮಾಡಿದರು.
ಕನ್ನಡಿಗರಲ್ಲಿ ಯಶ್ ವಿಶೇಷ ಮನವಿ
“ರಾಮ ನಮ್ಮವನು. ದೇಶದ ಗಲ್ಲಿ-ಗಲ್ಲಿಯಲ್ಲೂ ಶ್ರೀರಾಮನ ದೇವಾಲಯಗಳಿವೆ. ಎಲ್ಲರೂ ಈ ಪ್ರಯತ್ನದ ಹಿಂದೆ ನಿಲ್ಲಿ. ವಿಶೇಷವಾಗಿ ನಾನು ಕನ್ನಡಿಗರಲ್ಲಿ ಹಾಗೂ ದಕ್ಷಿಣ ಭಾರತೀಯರಲ್ಲಿ ಕೇಳಿಕೊಳ್ಳುತ್ತೇನೆ. ಒಂದು ಒಳ್ಳೆಯ ಪ್ರಯತ್ನದ ಬೆನ್ನಿಗೆ ನಿಲ್ಲಿ, ಶ್ರಮವನ್ನು ಗೌರವಿಸಿ, ಸಿನಿಮಾವನ್ನು ಅಪ್ಪಿಕೊಳ್ಳಿ” ಎಂದು ಯಶ್ ಭಾವುಕರಾಗಿ ಹೇಳಿದರು.
ರಣಬೀರ್, ಸಾಯಿ ಪಲ್ಲವಿ ಬಗ್ಗೆ ಯಶ್ ಏನು ಹೇಳಿದರು?
ಕಾರ್ಯಕ್ರಮದಲ್ಲಿ ಸಹ ಕಲಾವಿದರ ಬಗ್ಗೆಯೂ ಯಶ್ ಮಾತನಾಡಿದರು.
ರಣಬೀರ್ ಕಪೂರ್ ಬಗ್ಗೆ: “ರಣಬೀರ್ ರಂತ ಅದ್ಭುತ ನಟನನ್ನು, ಮಾನವೀಯ ವ್ಯಕ್ತಿಯನ್ನು ನಾನು ನೋಡಿಲ್ಲ. ಪಾತ್ರಕ್ಕೆ ತಮ್ಮನ್ನು ತಾವು ಅರ್ಪಿಸಿಕೊಂಡಿದ್ದಾರೆ.”
ಸಾಯಿ ಪಲ್ಲವಿ ಬಗ್ಗೆ: “ಬಹಳ ಪವಿತ್ರ ವ್ಯಕ್ತಿತ್ವದವರು. ಸೀತೆಯ ಪಾತ್ರ ಮಾಡಲು ಅವಕಾಶ ಸಿಕ್ಕಿದ್ದನ್ನು ವರದಂತೆ ಭಾವಿಸುತ್ತಾರೆ. ಮಾತನಾಡುವಾಗಲೆಲ್ಲ ದೇವರ ಬಗ್ಗೆಯೇ ಮಾತನಾಡುತ್ತಿದ್ದರು. ಅದ್ಭುತ ನಟಿ.”
ಲಕ್ಷ್ಮಣನ ಪಾತ್ರ: “ಲಕ್ಷ್ಮಣನ ಪಾತ್ರ ಮಾಡಿದ ಕಲಾವಿದ ಎಲ್ಲರಿಗೂ ಶಾಕ್ ಕೊಡಲಿದ್ದಾರೆ” ಎಂದು ಯಶ್ ಹೇಳಿದರು.
ಇದಲ್ಲದೆ ನಿರ್ದೇಶಕ ನಿತೀಶ್ ತಿವಾರಿ, ಎ.ಆರ್ ರೆಹಮಾನ್ ಮತ್ತು ನಿರ್ಮಾಪಕ ನಮಿತ್ ಮಲ್ಹೋತ್ರಾ ಅವರ ಬಗ್ಗೆಯೂ ಯಶ್ ಗೌರವದಿಂದ ಮಾತನಾಡಿದರು.
—
ನಿಮ್ಮ ಅನಿಸಿಕೆ ಏನು? ಕಾಮೆಂಟ್ ಮಾಡಿ ತಿಳಿಸಿ!